១៨/០៨/២០២២
ខេត្តកំពង់ឆ្នាំង÷ក្រោយពីរដ្ឋបាលខេត្តទទួលបានពាក្យបណ្ដឹងរបស់ប្រជាពលរដ្ឋ ១០ គ្រួសារស្នើសុំអន្តរាគមន៍ជួយរកយុត្តិធម៌រឿងទំនាស់ដីធ្លីរវាង អ្នកមានលុយ.មានអំណាច មានងារជា ឯកឧត្តម បម្រើការងារនៅក្រសួងកិច្ចការនារីនិងនៅសកលវិទ្យាល័យ ឥន្ទ្រ វិជ្ជា បាន ប្តឹង អាជ្ញាធរស្រុក.អាជ្ញាធរឃុំ.ប្រជាពលរដ្ឋនិងអ្នកសារព័ត៌មានសរុបចំនួន ១៥នាក់ទៅតុលាការនិងស្នងការដ្ឋាននគរបាលខេត្តកំពង់ឆ្នាំងពីបទ(ប្រើអំពើហិង្សាទៅលើអ្នកកាន់កាប់អចលនវត្ថុ.បទញុះញុងនិងបទបរិហារកេរ្តិ៍)រឿងទំនាស់ដីធ្លីនៅចំណុចស្ពាន អូសេសាច់ ស្ថិតនៅក្នុងភូមិស្រះកែវឃុំមេលំ ស្រុកបរិបូណ៌ រួចមក នៅព្រឹកថ្ងៃទី១៨ខែសីហា ឆ្នាំ២០២២ អាជ្ញាធរខេត្តកំពង់ឆ្នាំង ដឹកនាំដោយលោក វ៉ាន់ ប៊ុនថាត នាយកទីចាត់ការអន្តរវិស័យ ខេត្តកំពង់ឆ្នាំង បានដឹកនាំកម្លាំងចម្រុះ ចុះដល់មូលដ្ឋាន ចូលរួមប្រជុំនៅសាលាឃុំ មេលំ នឹងទៅពិនិត្យទីតាំងដីទំនាស់ជាក់ស្តែង ដេីម្បីពិនិត្យស្រាវជ្រាវ រកមូលហេតុ នៃទំនាស់ ដែលឈានទៅដល់ការប្តឹងផ្ដល់គ្នាចូលដល់ទៅតុលាការ ។
នៅក្នុងការចុះទៅប្រជុំ នឹង ពិនិត្យទីតាំងដីទំនាស់នោះលោក វ៉ាន់ ប៊ុនថាត បានបញ្ជាក់ប្រាប់អ្នកសារព័ត៌មានថា គ្រួសារលោក យូ ប៉ាសិទ្ធិ គឺមានប័ណ្ណសំគាល់សិទ្ធិសរុប ២៣ ប័ណ្ណ ទំហំជាង៨០ហិចតា ចំណែករឿងច្បាប់នៃការឈូសឆាយសូមអ្នកសារព័ត៌មានសួរលោកអភិបាលស្រុកចុះ។
ចំណែកអ្នកស្រី ឯក លក្ខិណា តំណាងលោក យូ ប៉ាសិទ្ធិ វិញបានបញ្ជាក់ថាដីរបស់គាត់មានរហូតទៅដល់៨០ហិកតា ជាងឯណោះ ចំពោះឯកសារប្លង់ដីមិនអាចទាន់បង្ហាញពេលនេះបានទេចាំទៅដោះស្រាយគ្នានៅសាលាខេត្ត។
ចំណែកច្បាប់នៃការឈូសឆាយនឹងការសាងសង់សំណង់ផ្សេងៗនៅលេីទីតាំងដីនោះ អ្នកស្រី ឯក លក្ខិណា បានអះអាងថាគឺពិតជាមាន ច្បាប់ ត្រឹមត្រូវទាំងអស់ ប៉ុន្តែលោក កេត សុឃា មេឃុំ មេលំ បានបដិសេធយ៉ាងច្បាស់ៗថា ដីដែលឈូសឆាយទាំងអស់មានច្បាប់ត្រឹមតែ ៣០ហិកតា ប៉ុណ្ណោះ ចំណែកការឈូសឆាយដ៍ច្រេីនទៀតនោះគឺមិនមានច្បាប់ឡើយ។
រីឯលោក ចេង ចាន់ដូណា អភិបាលស្រុកបរិបូណ៌បានឆ្លើយទាំងរបៀបស្ទាក់ស្ទើរថា
ការឈូសឆាយ មានច្បាប់ តែច្បាប់នោះមិនមែនលោកអ្នកចេញឲ្យទេគឺអភិបាលស្រុកជំនាន់មុន។
ប្រជាពលរដ្ឋនិងលោកមេឃុំ បានលើកឡើងបន្តទៀតថា លោក យូ ប៉ាសិទ្ធិ បានប្ដឹងពួកគាត់ពីបទ(ប្រើហិង្សាទៅលើអ្នកកាន់កាប់អចលនវត្ថុ.បទញុះញុងនិងបរិហារកេរ្តិ៍) ហើយតុលាការក៏បានកោះហៅពួកគាត់ឲ្យចូលខ្លួនទៅបំភ្លឺជាបន្តបន្ទាប់។
លោក មេឃុំ ដែលត្រូវ លោក យូ ប៉ាសិទ្ធិប្តឹងដែរនោះបានបញ្ជាក់ទៀតថា៖ ក្រោយពេលមានវិវាទ រវាង ប្រជាពលរដ្ឋ និងលោក យូ ប៉ាសិទ្ឋិ ក្រុមការងារចម្រុះថ្នាក់ស្រុក និងខេត្ត បានចុះធ្វើការស្រាវជា្រវក្នុងរឿងនេះ ជាបន្តបន្ទាប់ តែមិនទាន់ទទួលបាបលទ្ឋផលនៅឡើយទេ តែទោះជាយ៉ាងណារូបគាត់និងប្រជាពលរដ្ឋរងគ្រោះ ១០គ្រួសារទៀតសង្ឃឹមនិងមានទំនុកចិត្តលើ ឯកឧត្តម អភិបាលខេត្តកំពង់ឆ្នាំងនិងជួយរកយុត្តិធម៍ជូនពួកគាត់។
បើតាមការអះអាងរបស់អាជ្ញាធរឃុំនិងប្រជាពលរដ្ឋបានលើកឡើងបន្តទៀតថាដីរបស់ក្រុមគ្រួសារលោក យូ ប៉ាសិទ្ឋ មានទំហំតែ ៧៦ហិចតាជាងប៉ុណ្ណោះ ប៉ុន្តែលោកយូ ប៉ាសិទ្ឋិបានឈូសបំពានព័ទ្ឋយកដីរហូតដល់ ទំហំ ជាង៨៥ហិចតាទើបធ្វើឲ្យប៉ះពាល់ទៅដល់ដីរបស់ប្រជាពលរដ្ឋដែលនៅជាប់ព្រំប្រទល់បែបនេះ។
ក្នុងនាមលោកជាមេឃុំ និងប្រជាពលរដ្ឋ ជាម្ចាស់ដី មិនចង់វែងឆ្ងាយទេ គឺសុំថា៖ បើលោក យូ ប៉ាសិទ្ឋ មានដីទំហំប៉ុណ្ណា យកប៉ុណ្ណឹងចុះ សល់ប៉ុន្មាន ទុកឱ្យប្រជាពលរដ្ឋវិញ គឺចប់ហើយ ។
មហាជនបានលើកឡើងថា ដើម្បីជៀសវាងវិវាទកេីតឡេីង មុននឹងធ្វើការឈូសឆាយ ឬ ធ្វើរបង គួរណាស់តែភាគីជាម្ចាស់ដី សុំច្បាប់ទៅអាជ្ញាធរឱ្យបានត្រឹមត្រូវ ជាមុនសិន ហើយការបោះបង្គោលព្រំប្រទល់ គឺត្រូវមានអាជ្ញាធរ និង ភាគីដែលមានព្រំប្រទល់ដីជាប់គ្នាចូលរួមទើបគ្មានទំនាស់កើតឡើង។
ប៉ុន្តែរឿងវិវាទខាងលើនេះដោយសារភាគីលោកយូ ប៉ាសិទ្ធិ សម្រេចចិត្តធ្វើដោយឯកតោភាគី ទើបវិវាទមួយនេះកើតឡើងនាំឈឺក្បាលដល់អាជ្ញាធរ។
យោងតាមផ្លូវច្បាប់ ការឈូសឆាយដីព្រៃក្នុងតំបន់ ២ ប្រសិនបើគ្មានច្បាប់អនុញ្ញាតគឺខុសច្បាប់ហេីយ។
ចំណែកឯការឈូសឆាយបំភ្លិចបំផ្លាញទ្រព្យសម្បត្តិរបស់អ្នកដទៃគឺជាបទល្មើសព្រហ្មទណ្ឌ។
អ្នកសារព័ត៌មានមិនអាចជួបផ្ទាល់ សុំការបំភ្លឺពីលោក យូ ប៉ាសិទ្ធិ បានទេ បានត្រឹមតែសម្ភាសន៍ អ្នកស្រី ឯក លក្ខិណា ជាមេការនៅទីនោះប៉ុណ្ណោះ។អ្នកសារព័ត៌មានយើងរង់ចាំការបកស្រាយពីលោកយូ ប៉ាសិទ្ធិ ជានិច្ចដោយយោងទៅតាមច្បាប់ស្ដីពីរបបសារព័ត៌មាន។
ដោយសហការី rithysen news
