២០/០៤/២០២២
ខេត្តកំពង់ឆ្នាំង÷ក្នុងពេលថ្មីៗនេះបន្ទាប់ពីសារព័ត៌មានបានចុះផ្សាយពីរឿងជនខិលខូចលួចឈូសទន្ទ្រានរំលោភយកដីដែនជម្រកសត្វព្រៃអស់ទំហំប្រមាណ ២០ ទៅ ៣០ ហិតតានៅចំណុច អូចាប់ប្រាំងនិងចំណុចថ្មបណ្តេីត ស្ថិតនៅក្នុងភូមិដំណាក់ខ្លុង ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង រួចមកស្រាប់តែនៅថ្ងៃទី ១២ខែមេសាឆ្នាំ ២០២២មន្ទីរបរិស្ថានខេត្តកំពង់ឆ្នាំងដែលមានលោក ម៉ន ផល្លា ជាប្រធានមន្ទីរ និង លោក លែង សំអេត ជាអនុប្រធានមន្ទីរទទួលបន្ទុកកិច្ចការងារគាំពារព្រៃឈើទូទាំងខេត្តកំពង់ឆ្នាំង បានចេញសេចក្តីថ្លែងការណ៍ មិនទទួលខុសត្រូវ ដើម្បីគេចវេសពីកំហុសនឹង ការពារបទល្មើសទៅវិញ។
ជាក់ស្ដែងជុំវិញការបំភ្លឺកាលពេលថ្ងៃទី ១២ ខែមេសាឆ្នាំ ២០២២
ចំណុចទី ១ នៃសេចក្តីថ្លែងការណ៍បានបញ្ជាក់ថា÷
-ករណីជនល្មើសលួចឈូសឆាយបំពាន ទន្ទ្រានយកដីដែនជម្រកសត្វព្រៃភ្នំឱរ៉ាល់នៅចំណុច(អូរចាប់ប្រាំងនិងចំណុចថ្មបណ្ដើត)ស្ថិតនៅភូមិដំណាក់ខ្លុងឃុំក្តុលសែនជ័យ ករណីនេះបានកើតឡើងតាំងពីខែ ធ្នូ ឆ្នាំ ២០២១ មន្ទីរបរិស្ថានបានចុះពិនិត្យស្រាវជ្រាវដើម្បីកំណត់មុខសញ្ញាជនសង្ស័យនឹង(បានជួបសាកសួរជនសង្ស័យ)អំពីហេតុផលផ្សេងៗពាក់ព័ន្ធការឈូសឆាយនោះ ជនសង្ស័យឆ្លើយថា(ខ្លួនមិនបានដឹងថាជាដីដែនជម្រកសត្វព្រៃភ្នំឱរ៉ាល់ ហើយស្ម័គ្រចិត្តប្រគល់ដីជូនរដ្ឋវិញ)។
(ការបំភ្លឺចំណុចទី១នេះតើ ថ្នាក់ដឹកនាំនិងមហាជនយល់ឃើញយ៉ាងណាដែរ…?)
-សម្រាប់ខ្ញុំជាអ្នកសារព័ត៌មានយល់ឃើញថា ការថ្លែងការណ៍បែបនេះគ្រាន់តែជាការដោះសារ គេចវេស យករួចខ្លួន ដោយមិនមានការទទួលខុសត្រូវចំពោះភារកិច្ចរបស់ខ្លួនតែប៉ុណ្ណោះ។
-ក្នុងនាមខ្លួនជាមន្ត្រីអនុវត្តច្បាប់ បានជួបមុខសញ្ញាហើយ បែជាមិនបានឃាត់ខ្លួន កសាងសំណុំរឿងមិនបានឆ្លងមក ព្រះរាជអាជ្ញា ដើម្បីនាំជនសង្ស័យមកបំភ្លឺ ដើម្បីដាក់បន្ទុកតាមច្បាប់ស្ដីពីបរិស្ថាន និងម្យាងទៀតជនសង្ស័យបានប្រគល់ដីមកឲ្យរដ្ឋវិញដើម្បីបញ្ចប់រឿង តែសាច់រឿងនោះមិនទាន់បានបញ្ចប់នៅឡើយទេ ។
(ផ្អែកលើច្បាប់ស្ដីពីតំបន់ការពារធម្មជាតិ ការឈូសឆាយបំពានដីដែនជម្រកសត្វព្រៃដោយខុសច្បាប់ជា(បទល្មើសព្រហ្មទណ្ឌជាបទឧក្រិដ្ឋ)។
អញ្ចឹង ចំពោះមន្ត្រីបរិស្ថាន អ្នកអនុវត្តច្បាប់ បរិស្ថាន បែជាធ្វើការបិទបាំងឲ្យជនសង្ស័យរួចខ្លួន។
(បេីផ្អែកលើច្បាប់ស្ដីពីតំបន់ការពារធម្មជាតិបរិស្ថាន មន្រ្តីរូបណាជួយសម្រួលឲ្យបទល្មើសព្រៃឈើត្រូវមានទោសដូចគ្នា)។
-ចំណុចទី 2 នៃសេចក្តីថ្លែងការណ៍បានបញ្ជាក់ថា÷ចំណុចថ្មបណ្តេីត តាមការបញ្ជាក់របស់លោកគ្រូភឿន ថាមន្ត្រីបរិស្ថានទៅចង្អុលប្រាប់នោះគឺ(គ្មានការពិតទេ) ប៉ុន្តែទីតាំងដីនោះត្រូវបានមន្ទីរបរិស្ថានរកឃើញថាស្ថិតក្នុងដែនជម្រកសត្វព្រៃភ្នំឱរ៉ាល់ជាប់នឹងដីដែលមានប្លង់រឹងរបស់គាត់ទើបឈ្មោះគ្រូភឿន សុំស្ម័គ្រចិត្តប្រគល់ដីនោះមកឲ្យរដ្ឋវិញ និងសូមសំណូមពរឲ្យមន្ត្រីបរិស្ថានទៅបោះបង្គោលព្រំប្រទល់ឲ្យបានច្បាស់លាស់ជៀសវាងមានកាភ័ណ្ឌច្រឡំបន្តទៀត។
-ការបំភ្លឺត្រង់ចំណុចទី ២នេះក៏មិនខុសគ្នាទៅហ្នឹងចំណុចទី ១ ដែរ មានន័យថាសុទ្ធតែជារឿងបិទបាំងកំហុសទាំងអស់។
ក្នុងសេចក្តីថ្លែងការណ៍របស់មន្ទីរបរិស្ថានបញ្ជាក់ថាគ្រូ ភឿន និយាយមិនពិត តែ គ្រូភឿនថាអ្វីដែលគាត់និយាយគឺពិតទាំងអស់។
ក្នុងសេចក្តីថ្លែងការណ៍ថាគ្រូភឿន មានប្លង់រឹង ដូច្នេះប្លង់រឹងគឺមាន លេខ និយាមកា និងផ្ទៃក្រឡាច្បាស់លាស់ណាស់ចុះហេតុអី្វ ប្រើពាក្យថាឈូសច្រឡំរហូតទៅដល់ជិត ១០ ហិកតា
គ្រូភឿនធ្វើដល់នាយកសាលានិងជាមន្ត្រីរាជការឆ្លើយថាឈប់ច្រឡំចុះប្រជាពលរដ្ឋល្ងិតល្ងង់វិញ។
តើនេះជាការឆ្លើយដេីម្បីការពារជនល្មើសពីមន្ត្រីបរិស្ថានដែរទេ…?
-ចំណែកឯសេចក្តីថ្លែងការណ៍ចំណុចទី ៣ ដែលមន្ទីរបរិស្ថានអះអាងថាការបោះបង្គោលពិតជាត្រឹមត្រូវតាមលេខនិយាមការ និងតាមផែនទីដែនជំរកសត្វព្រៃភ្នំឱរ៉ាល់ពិតប្រាកដមិនបានប៉ះពាល់ដល់ដីរបស់ប្រជាពលរដ្ឋទេ។
ត្រង់ចំណុចទី ៣ នេះ អ្នកសារព័ត៌មានសុំសួថា ទីតាំងតាំងសង់ប៉ុស្តិ៍ស្នាក់ការថ្មីដែលសង់មិនទាន់រួចរាល់នៅខាងកើតខ្ទមអ្នកតា ជិតកន្លែងដាក់កុងត្រូលស្ថិតនៅភូមិកោះខ្ទុម្ភ ឃុំជៀប តើជាដីក្នុងដែនឬដីក្រៅដែន…?
ហេីយប្រសិនបើក្រុមការងារថ្នាក់ខេត្តឬថ្នាក់ក្រសួងបរិស្ថានរកឃើញថាពិតជាប៉ះពាល់ដល់ដីរបស់ប្រជាពលរដ្ឋមែនតេីលោកលែង សំអេត និងលោក ម៉ន ផល្លា ហ៊ានទទួលខុសត្រូវដែរឬទេ…?។
-ចំពោះការថ្លែងការណ៍ចំណុចទី ៤ ដែលមន្ទីរបរិស្ថានអះអាងថា ក្នុងន័យបំភ្លឺកាលពីថ្ងៃទី ៧ខែកុម្ភៈឆ្នាំ២០២២ គឺចង់និយាយមានន័យថាមន្ទីរបរិស្ថានមិនបានបញ្ជាក់ថាឃុំជៀបបានសុំធ្វើអនុប្រយោគកាត់ឆ្វៀលជូនប្រជាពលរដ្ឋនោះទេ។
-ត្រង់ចំណុចនេះសូមមហាជនពិនិត្យមើលចុះតេីខ្លឹមសារនៃសេចក្តីបំភ្លឺដែលមន្ទីរបរិស្ថានបំភ្លឺកាលពីថ្ងៃទី ៧ ខែកុម្ភៈឆ្នាំ ២០២២ នោះមានន័យដូចម្ដេច ។
តើវាស៊ីសង្វាក់គ្នាដូចក្នុងសេចក្តីថ្លែងការណ៍ការថ្ងៃទី ១២ ខែមេសាឆ្នាំ ២០២២ ដែរឬទេ…?។
-សរុបសេចក្តីមកអ្វីដែលមន្ទីរបរិស្ថានបានថ្លែងការណ៍នៅថ្ងៃទី ១២ខែមេសាឆ្នាំ ២០២២ត្រូវបានមហាជនមើលឃើញថាគឺជាការថ្លែងបែបមិនទទួលខុសត្រូវចំពោះភារកិច្ចរបស់ខ្លួនប៉ុណ្ណោះ ហេីយថែមទាំងជួយបិទបាំងការពារជនល្មើសឲ្យរួចផុតពីសំណាញ់ច្បាប់ថែមទៀតផង។
កន្លងមកគេសង្កេតឃើញថាលោក លែង សំអេត រូបនេះ និងបក្សពួក សកម្មបំផុតក្នុងការធ្វើរបាយការណ៍ និងកសាងសំណុំរឿងបញ្ជូនមកតុលាការ ជាក់ស្ដែងដូចជារបាយការណ៍កាលពីថ្ងៃទី ១១ខែមិថុនាឆ្នាំ២០២០។
ទោះបីជារឿងខ្លះគ្មានភស្តុតាងពិតប្រាកដក៏ដោយ រឿងខ្លះប្រជាពលរដ្ឋបានប្រគល់ដីឲ្យរដ្ឋវិញដូចគ្នាតែលោកលែង សំអេត នៅតែកសាងសំណុំរឿង បញ្ជូនទៅតុលាការរហូតដល់មានប្រជាពលរដ្ឋជាប់ពន្ធនាគារដោយសារតែមន្ត្រីរូបនេះថែមទៀតផង។
ច្បាប់បរិស្ថាននៅប្រទេសកម្ពុជាមានស្តង់ដារពីរមែនដែរឬទេ?
ចុះហេតុអី្វការឈូសឆាយនៅចំណុចអូរចាប់ប្រាំងនិងចំណុចថ្មអណ្តេីតទំហំរហូតដល់២០ទៅ៣០ ហិចតានិង ស្គាល់ជនសង្ស័យអស់ហើយបែជាលោក លែង សំអេត មិនកសាង
-ចំណុចមិនប្រកតីទាំងនេះ សូមឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និង ឯកឧត្តមរដ្ឋមន្ត្រីក្រសួងបរិស្ថានមេត្តាស៊ើបអង្កេតឲ្យបានច្បាស់លាស់ដើម្បីឲ្យ មន្ត្រីទាំងនោះទទួលខុសត្រូវចំពោះតួនាទីរបស់ខ្លួន៕ ដោយ សុខ ឧត្តម
