កិច្ចប្រជុំនិងធ្វើអធិការកិច្ចនៅអយ្យការអមសាលាដំបូងខេត្តកំពង់ឆ្នាំង មន្ត្រីនគរបាលយុត្តិធ៌ម និង ពន្ធធនាគារខេត្តកំពង់ឆ្នាំង!!!

១៣/០២/២០២៣

កំពង់ឆ្នាំង៖ នៅព្រឹកថ្ងៃទី១៣ ខែកុម្ភៈ ឆ្នាំ២០២៣នេះ នៅសាលាដំបូង និងអយ្យការអមសាលាដំបូងខេត្តកំពង់ឆ្នាំង បានរៀបចំកិច្ចប្រជុំស្តីពីការចុះអធិការកិច្ចនៅអយ្យការអមសាលាដំបូងខេត្តកំពង់ឆ្នាំង មន្ត្រីនគរបាលយុត្តិធម៌និង ពន្ធធនាគារខេត្តកំពង់ឆ្នាំង ក្នុងដែនសមត្ថកិច្ចរបស់មហាអយ្យការអមសាលាឧទ្ធរណ៍ភ្នំពេញ ឆមាសទី១ ប្រចាំឆ្នាំ២០២៣។

កិច្ចប្រជុំ និងការចុះអធិការកិច្ចខាងលើនេះ ប្រព្រឹត្តទៅក្រោមវត្តមានដ៍ខ្ពង់ខ្ពស់ ឯកឧត្តម លឹម សុគន្ថា អគ្គព្រះរាជអាជ្ញារង អមសាលាឧទ្ធរណ៍ភ្នំពេញ ឯកឧត្តម មាស សុភក្តិ អគ្គព្រះរាជអាជ្ញារងអមសាលាឧទ្ធរណ៍ភ្នំពេញ ឯកឧត្តម លោក លោកស្រី គណប្រតិភូអមដំណើរ និងមានការអញ្ជើញចូលរួមពី ឯកឧត្តម គឹម រ័ត្នណារិន ប្រធានសាលាដំបូងខេត្តកំពង់ឆ្នាំង ឯកឧត្តម អ៉ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង លោកអនុប្រធានសាលាដំបូង អស់លោក លោកស្រី ចៅក្រម ព្រះរាជអាជ្ញារង និងលោកប្រធានលេខាធិការដ្ឋាន អស់លោក លោកស្រី ជាប្រធានមន្ទីរអង្គភាពពាក់ព័ន្ធ អស់លោក លោកស្រី កងកម្លាំងទាំង២អង្គភាពផងដែរ ។

ឯកឧត្តម អ៉ិត សុធាព្រះរាជអាជ្ញាមានប្រសាសន៍ថា ចំពោះការចុះអនុវត្តច្បាប់របស់សមត្ថកិច្ចកន្លងមក មានភាពល្អប្រសើរច្រើន តែក្នុងនាមយើងជាមន្រ្តីនគរបាលតាមមូលដ្ឋានត្រូវបង្កើនការយកចិត្តទុកដាក់ចុះបង្រ្កាបបទល្មើសនានាអោយខាតតែបាន ធ្វើយ៉ាងណាដើម្បីធានាសុខសុវត្ថិភាពជូនពលរដ្ឋក្នុងមូលដ្ឋាន។ ជាមួយគ្នានេះ អង្គពិធីបានជម្រុញអោយមន្រ្តីនគរបាលយុត្តិធម៌ធ្វើការចុះផ្សព្វផ្សាយច្បាប់ និងណែនាំដល់ប្រជាពលរដ្ឋនៅតាមបណ្តាស្រុក ឃុំ-សង្កាត់ និងតាមភូមិនីមួយៗ ក្នុងខេត្តកំពង់ឆ្នាំងអោយនាំគ្នាគោរពច្បាប់ និងត្រូវរាយការណ៍ជូនសមត្ថកិច្ចករណីមានបទល្មើសកើតឡើង។

ឯកឧត្តម លឹម សុគន្ថា អគ្គព្រះរាជអាជ្ញារង អមសាលាឧទ្ធរណ៍ភ្នំពេញ និងឯកឧត្តម មាស សុភក្តិ អគ្គព្រះរាជអាជ្ញារងអមសាលាឧទ្ធរណ៍ភ្នំពេញ បានបញ្ជាក់ដែរថា ការចុះអធិការកិច្ចនៅស្ថាប័នអយ្យការ នៅមន្ត្រីនគរបាលយុត្តិធម៌ និងពន្ធនាគារខេត្តកំពង់ឆ្នាំងក្នុងដែនសម្ថកិច្ចរបស់សាលាឧទ្ធរណ៍ភ្នំពេញ មានសារៈសំខាន់ណាស់ ហើយគោលដៅ ទី១ ចង់ពង្រឹងច្បាប់ និងផ្នែកនីតិវិធីដល់មន្ត្រីនគរបាលយុត្តិធម៌ដែលជាអ្នកអនុវត្តច្បាប់ និងទី២ គឺពិនិត្យផ្នែកនីតិវិធី និងដោះស្រាយបញ្ហាប្រឈមនានាដែលមន្រ្តីនគរបាលយុត្តិធម៌បានអនុវត្តកន្លងមក ហើយឯកឧត្តមបានណែនាំអោយមន្រ្តីនគរបាលយុត្តិធម៌ និងអង្គភាពពាក់ព័ន្ធ បង្កើនការយកចិត្តទុកដាក់អនុវត្តតួនាទីខ្លូនស្របតាមនីតិវីធីដែលមានជាធរមាន និងបានត្រឹមត្រូវតាមច្បាប់។ជាពិសេសការអនុវត្តច្បាប់ចំពោះ ជនសង្ស័យដែលជាអនីតិជនអាយុក្រោម១៨ឆ្នាំ។

ជាមួយគ្នានេះក្រោយពីលោកបានទទួលរបាយការណ៍ និងសេចក្តីរាយការណ៍របស់ប្រធានសាលាដំបូងខេត្ត និងព្រះរាជអាជ្ញាសាលាដំបូងខេត្ត ពីការអនុវត្តច្បាប់របស់អយ្យការ មន្ត្រីនគរបាលយុត្តិធម៌ និងការងារពន្ធនាគារ ឯកឧត្តម លឹម សុគន្ថា អគ្គព្រះរាជអាជ្ញារង និង ឯកឧត្តម មាស សុភក្តិ បានធ្វើការកោតសរសើរ និងវាយតម្លៃខ្ពស់ចំពោះ ឯកឧត្ត អ៉ិត សុធា ព្រះរាជអាជ្ញាខេត្តកំពង់ឆ្នាំង ក្រោមការដឹកនាំកន្លងមក ឃើញថាមន្ត្រីនគរបាលខេត្តកំពង់ឆ្នាំងបានខិតខំបំពេញតួនាទីជាមន្ត្រីបម្រើរាស្ត្របានល្អប្រសើរ និងលើកទឹកចិត្តអោយអយ្យការ និងមន្រ្តីនគរបាលទាំងអស់សហការគ្នា រួមគ្នាបង្ក្រាបបទល្មើសនានាអោយខានតែបាន ដើម្បីធានាបាននូវសុខសន្តិភាព និងភូមិឃុំមានសុវត្ថិភាព ជូនប្រជាពលរដ្ឋ៕