ខេត្តកំពង់ឆ្នាំង÷នៅព្រឹកថ្ងៃទី ១៨ខែមករាឆ្នាំ ២០២៣ នេះ នៅសាលាឃុំមេលំស្រុកបរិបូណ៌បានរៀបចំកិច្ចប្រជុំសម្របសម្រួលទំនាស់ដីធ្លីមួយរវាងប្រជាពលរដ្ឋប្រមាណ ១០គ្រួសារដែលមានទំនាស់ដីធ្លីជាមួយនឹងឯកឧត្តម យូរ ប៉ា សិទ្ធិ បម្រើការងារនៅក្រសួងកិច្ចការនារី ។
ក្នុងកិច្ចប្រជុំសម្របសម្រួលនោះក្រោមវត្តមាន ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម សុីវ រុន ក្រុមប្រឹក្សាខេត្ត លោកឧត្តមសេនីយ៍ត្រីសាក់ សារាង មេបញ្ជាការកងរាជអាវុធហត្ថខេត្ត.លោកស្នងការរង.លោក លី សុភាប្រធានមន្ទីរដែនដី លោក ចេង ចាន់ដូណា អភិបាលស្រុកបរិបូណ៌និងអភិបាលរងស្រុក និងមានការចូលរួមពីកងកម្លាំងទាំងបី មន្ត្រីរាជការ និង ភាគីទំនាស់ទាំងពីភាគី។
ក្នុងកិច្ចប្រជុំ ឯកឧត្តម អភិបាលខេត្តបានស្ដាប់សេចក្តីរាយការណ៍ របស់លោកអភិបាលស្រុកបរិបូណ៌.គូភាគីទំនាស់. និងលោកប្រធានមន្ទីរដែនដី រួចមក ឯកឧត្តម បានលើកយក ចំណុចសំខាន់ៗដើម្បីដោះស្រាយជូនគូរភាគីទាំងពីរតាមគោលនយោបាយ ឈ្នះ ឈ្នះ !!!
ជាលទ្ធផល ភាគី អ្នកស្រី ឯក លក្ខិណា តំណាង ឯកឧត្តម យូរ ប៉ាសិទ្ធិ ព្រមទទួលយកដីដែលគ្រួសារខ្លួនគ្រប់គ្រងមានប័ណ្ណសម្គាល់សិទ្ធិ ចំនួន ២៣ប័ណ្ណទំហំសរុបប្រមាណ ៧៦ហិចតាដែលមានប្លង់បង្ហាញកំណត់ទីតាំងស្រាប់ក្រៅពីដីនោះគឺប្រគល់ឲ្យប្រជាពលរដ្ឋវិញ។
ការងារនេះ ឯកឧត្តម អភិបាលខេត្ត បានប្រគល់ទៅឲ្យលោកប្រធានមន្ទីររៀបចំដែនដីធ្វើការជាមួយហ្នឹងអាជ្ញាធរមូលដ្ឋានចុះទៅវាស់វែងជាក់ស្ដែងដើម្បីចេញប្លង់កម្មសិទ្ធិជូនគូភាគីទាំងសងខាងដើម្បីបញ្ចប់ទំនាស់។
សូមបញ្ជាក់ផងដែរថាទំនាស់ដីធ្លីនៅចំណុចស្ពាន អូរសេខ្សាច់ ស្ថិតនៅក្នុងភូមិស្រះកែវ ភូមិទួលរកា ឃុំមេលំ ស្រុកបរិបូណ៌ បានអូសបន្លាយរយៈពេលជាងមួយឆ្នាំហេីយ រហូតមកដល់ពេលនេះហើយកន្លងមកអាជ្ញាធរស្រុកក៏បានប្រជុំដោះស្រាយជាច្រើនលើកច្រើនសារដែរតែគូភាគីទំនាស់ទាំងពី មិនត្រូវរូវគ្នាសោះ រហូតឈានទៅដល់ភាគី ឯកឧត្តម យូរ ប៉ាសិទ្ធិ ប្ដឹងអភិបាលរងស្រុកបរិបូណ៌ មេឃុំប្រជាពលរដ្ឋ និង អ្នកសារព័ត៌មានទៅសមត្ថកិច្ចនិងតុលាការខេត្តកំពង់ឆ្នាំងហើយនៅប៉ុន្មានថ្ងៃខាងមុខនេះតុលាការក៏បានកោះហៅ មេឃុំ ប្រជាពលរដ្ឋនិងអ្នកសារព័ត៌មានឡើងសវនាការផងដែរ។
បញ្ចប់នៃកិច្ចប្រជុំដោះស្រាយឯកឧត្តមអភិបាលខេត្តបានជូនថវិកាប្រជាជនចំនួន ៣១នាក់ម្នាក់ៗទទួលបាន ១០ ម៉ឺន។
ប្រជាពលរដ្ឋបានថ្លែងអំណរគុណចំពោះឯកឧត្តមអភិបាលខេត្តកំពង់ឆ្នាំងដែលបានគិតគូរពីសុខទុក្ខជួយដោះស្រាយរាល់ទុក្ខលំបាករបស់ពួកគាត់៕
ដោយ សហការី rithysen news
