១៧/១២/២០២២
ខេត្តកំពង់ឆ្នាំង÷ថ្ងៃទី១៧ ខែធ្នូ ឆ្នាំ២០២២ ឯកឧត្តម ស៊ុន សុវណ្ណារិទ្ធិ និងលោកជំទាវ រួមជាមួយលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង ឯកឧត្ដមនាយឧត្ដមសេនីយ៍ សឹង សំណាង បានចូលរួមអមដំណើរលោកជំទាវកិត្តិសង្គហបណ្ឌិត ម៉ែន សំអន
ឧបនាយករដ្ឋមន្រ្តី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច អញ្ជើញជាអធិបតីក្នុងពិធីបើកព្រឹត្តិការណ៍បុណ្យរដូវរំហើយ តាមរយៈការប្រឡងដាល់អំបុក និងបង្ហើរខ្លែង ជ្រោមជ្រែងប្រពៃណីខ្មែរ នៅភូមិដំណាក់កកោះ ឃុំពោធិ៍ ស្រុកកំពង់លែង ខេត្ដកំពង់ឆ្នាំង។
ថ្លែងក្នុងឱកាសនោះផងដែរ លោកជំទាវកិត្តិសង្គហបណ្ឌិត បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ កីឡាករ កីឡាការិនី និងប្រជាពលរដ្ឋទាំងអស់ ដោយសេចក្តីនឹករលឹក។
កម្មវិធីប្រកួតនេះក៏មានរៀបចំកម្មវិធីនៅពេលយប់មានការប្រគុំតន្ត្រីសម័យ និងបុរាណ ការសម្តែងចាប៉ីដងវែង និងល្បែងកម្សាន្តជាច្រើនទៀត ដែលនឹងបង្កឲ្យកាន់តែមានភាពសប្បាយរីករាយថែមមួយកម្រិតទៀត ក្រោមម្លប់នៃសុខសន្តិភាព ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
ពិធីប្រឡងដាល់អំបុក និងបង្ហើរខ្លែង ដែលជាប្រពៃណីជាតិ មានរយៈពេល ២ថ្ងៃ ពីថ្ងៃទី១៧ ដល់ថ្ងៃទី១៨ ខែធ្នូ ឆ្នាំ២០២២ ដោយនៅពេលយប់មានការប្រគុំតន្ត្រីសម័យ និងបុរាណ ការសម្តែងចាប៉ីដងវែង និងល្បែងកម្សាន្តជាច្រើនទៀត ក្រោមការឧបត្ថម្ភពីមូលនិធិ អ៊ឹងហ្វោនដេសិន (ING FOUNDATION) ដែលដឹកនាំដោយ លោកឧកញ៉ា អ៊ឹង ប៊ុនហូវ និងលោកជំទាវ ព្រមទាំងក្រុមការងារ ដែលមានបេក្ខជន បេក្ខនារី មកពីក្រុមសិល្បៈនៃមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង និងមានការចូលរួមពីលោកគ្រូ អ្នកគ្រូ យុវជន យុវនារី អាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋយ៉ាងច្រើនកុះករ៕
ដោយសហការី rithysen news
