៩/០៥/២០២២
ខេត្តកំពង់ឆ្នាំង÷យោងលិខិតលេខ១០៦២ សជណ ចុះថ្ងៃទី ៥ ខែឧសភាឆ្នាំ២០២២ របស់ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ បានជម្រាបជូនមក លោក ឡោ សាលីម ប្រធានក្រុមប្រឹក្សាស្រុក និង ជាប្រធានគណៈកម្មាធិការបោះឆ្នោតជ្រើសរើសប្រធានការិយាល័យប្រជាពលរដ្ឋ ស្រុកកំពង់លែង និងលោក យ៉ែម លក្ខិណា អភិបាល នៃ គណៈអភិបាល ស្រុកកំពង់លែង ខេត្តកំពង់ឆ្នាំងអំពីភាពមិនប្រក្រតីករណីការបោះឆ្នោតជ្រើសរើសប្រធានការិយាល័យប្រជាពលរដ្ឋ ស្រុកកំពង់លែង ខេត្តកំពង់ឆ្នាំង។
-យោង ពាក្យបណ្ដឹងសុំអន្តរាគមន៍ចុះថ្ងៃទី ២១ខែកុម្ភៈឆ្នាំ ២០២២ របស់ឈ្មោះ លឹមដានីន។
-ចំណារដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃចុះថ្ងៃទី ២០ ខែមេសាឆ្នាំ ២០២២ លើរបាយការណ៍នៃការចុះត្រួតពិនិត្យលទ្ធផលនៃការបោះឆ្នោតរបស់នាយកដ្ឋានមុខងារនិងធនធាន។
ក្រសួងមហាផ្ទៃ បានចាត់ក្រុមការងារចុះសិក្សាស្រាវជ្រាវលើដំណើរការរៀបចំបោះឆ្នោតជ្រើសជ្រើសរើសប្រធានការិយាល័យប្រជាពលរដ្ឋនៅស្រុកកំពង់លែង។
-ជាលទ្ធផលក្រសួងមហាផ្ទៃបានពិនិត្យឃើញថា÷
គណៈកម្មាធិការបោះឆ្នោតជ្រើសរើសប្រធានការិយាល័យប្រជាពលរដ្ឋស្រុកកំពង់លែងអនុវត្ត(មិនទាន់បានត្រឹមត្រូវតាមនីតិវិធី )ដែលបានកំណត់នៅក្នុងចំណុច ខ.២.១ នៃសេចក្ដីណែនាំលេខ ០៣៧ សណន ចុះថ្ងៃទី៣ ខែតុលាឆ្នាំ ២០១៩ របស់ក្រសួងមហាផ្ទៃ ដែលជាហេតុធ្វើឲ្យមានបណ្ដឹងតវ៉ាទៅលើលទ្ធផលនៃការបោះឆ្នោតនេះទេ។
-ពាក់ព័ន្ធនឹងករណីនេះក្រសួងមហាផ្ទៃសូមធ្វើការណែនាំដូចខាងក្រោម÷
-អភិបាលស្រុកកំពង់លែងត្រូវ(បញ្ឈប់រាល់ការបញ្ចុះបញ្ចូល ឬ សម្របសម្រួលទាំងឡាយណាចំពោះបេក្ខជនដែលបានចូលរួមបោះឆ្នោតជ្រើសរើសប្រធានការិយាល័យប្រជាពលរដ្ឋក្នុងគោលបំណងផ្លាស់ប្ដូរលទ្ធផលនៃការបោះឆ្នោត។
-រដ្ឋបាលស្រុកកំពង់លែងត្រូវរៀបចំការបោះឆ្នោតជ្រើសរើសប្រធានការិយាល័យប្រជាពលរដ្ឋសារឡើងវិញដោយយកបេក្ខជនជាប់សម្រាំងរួចទាំងអស់មកធ្វើការបោះឆ្នោតឡើងវិញ ឲ្យស្របតាមនីតិវិធីដែលបានកំណត់នៅក្នុងសេចក្ដីណែនាំលេខ ០៣៧ សណនចុះថ្ងៃទី៣ ខែតុលាឆ្នាំ២០១៩ របស់ក្រសួងមហាផ្ទៃ។
-រដ្ឋបាលស្រុកកំពង់លែងត្រូវជូនដំណឹងមកក្រសួងមហាផ្ទៃអំពីការបរិច្ឆេទនៃការបោះឆ្នោតជ្រើសរើសប្រធានការិយាល័យប្រជាពលរដ្ឋដើម្បីចាត់ មន្ត្រីជំនាញឲ្យចូលរួមសង្កេតការណ៍ក្នុងអំឡុងពេលបោះឆ្នោត៕
