កំពង់ឆ្នាំង÷លោក លែង សំអេត តួនាទីអនុប្រធានមន្ទីរបរិស្ថាន ទទួលបន្ទុកការិយាល័យគាំពារបរិស្ថាននិងទទួលបន្ទុកដែនជម្រកសត្វព្រៃភ្នំឱរ៉ាល់ភូមិសាស្ត្រខេត្តកំពង់ឆ្នាំងដែលគេស្គាល់ថាជាអ្នកពូកែអែបអប យកគាប់យកគួរ.ពូកែរាយការណ៍បំផ្លើសការពិត.ហ៊ានបំភ័ន្តភ្នែករដ្ឋមន្ត្រីក្រសួងបរិស្ថាននិង ភូតកុហកសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយនឹងអតីតចៅហ្វាយខេត្តកំពង់ឆ្នាំងចាស់គឺលោកឈួរ ច័ន្ទឌឿន បានយកបង្គោលដែនជម្រកសត្វព្រៃភ្នំឱរ៉ាល់មកបោះហួសខ្សែបន្ទាត់ ដីដែនជម្រកសត្វព្រៃភ្នំឱរ៉ាល់បណ្តាលឲ្យប៉ះពាល់ដល់ដីលំនៅឋាន របស់ប្រជាពលរដ្ឋ រស់នៅ អាស្រ័យផលធ្វើអោយមានការថ្នាំងថ្នាក់យ៉ាងខ្លាំងពីសំណាក់ប្រជាពលរដ្ឋជាម្ចាស់ដី។
ទីតាំងដីដែលមន្ត្រីបរិស្ថានបោះបង្គោលរំលោភយកនោះស្ថិតនៅចំណុចខាងកេីត ខ្ទមអ្នកតាថ្មី ចំលេីទីតាំងទីស្នាក់ការបរិស្ថានដែលកំពុងសាងសង់មិនទាន់រួច ក្នុងភូមិកោះខ្ទុម ឃុំជៀប ស្រុកទឹកផុស ខេត្តកំពង់ឆ្នាំង។
ប្រជាពលរដ្ឋម្ចាស់ដីស្នើសុំឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំងមេត្តាចាត់ឲ្យក្រុមការងារថ្នាក់ខេត្តចុះពិនិត្យជាក់ស្ដែងតើការបោះបង្គោលព្រំ ដែនជម្រកសត្វព្រៃនៅចំណុចនោះត្រឹមត្រូវទៅតាមលេខនិយាមការដី ដែនជម្រកសត្វព្រៃភ្នំឱរ៉ាល់ ពិតប្រាកដ ដែរឬទេ?
ប្រសិនបើរដ្ឋបាលខេត្តរកឃើញពិតប្រាកដថាបង្គោលដែនជម្រកសត្វព្រៃនៅចំណុចនោះពិតជាបានបោះរំលោភចូលដីលំនៅដ្ឋានរបស់ប្រជាពលរដ្ឋពិតប្រាកដមែន តេីរដ្ឋបាលខេត្តមានវិធានការបែបណាចំពោះមន្ត្រីបរិស្ថានទាំងនេះ?
ម្យ៉ាងវិញទៀតប្រជាជនមានការងឿងឆ្ងល់ថាមុននឹងបោះបង្គោលដែនជម្រកសត្វព្រៃភ្នំឱរ៉ាល់ លោក ម៉ម ផល្លា ជាប្រធានសាម៉ីមន្ទីរបរិស្ថានខេត្តកំពង់ឆ្នាំងដែលបានចុះទៅពិនិត្យមើលជាក់ស្តែងត្រឹមត្រូវតាមលេខនិយាមការរបស់ក្រសួងដែរឬទេរឺមួយក៏ស្ដាប់តែសម្លេងច្រៀងបំពេររបស់លោកលែង សំអេត ជាអនុប្រធានមន្ទីរបរិស្ថានបានជាអនុវត្តន៍ហួសព្រំដែន បំពានមកលើដីប្រជាពលរដ្ឋស្លូតត្រង់បែបនេះ។
ប្រជាពលរដ្ឋស្នើសុំ ឯកឧត្តម ស៊ុនសុវណ្ណារិទ្ធិ ជួយរកយុត្តិធម៌ជូនពួកគាត់ដោយក្តីអនុគ្រោះ🙏🙏🙏៕
